車車的快樂日誌

2012年7月4日星期三

清新D

好熱好熱好熱呀！
香港的夏天真係好熱呀！
DISLIKE AR

返到公司諗諗今日LUNCH食嘜好呢？
天氣咁熱真係冇嘜胃口
不如食沙律啦！

落開街買左火龍果同青瓜，就整火龍果青瓜沙律啦
剩係沙律又有D悶喎！
睇下雪櫃仲有包餃子，一於煎左去先
咁就可以雙併喇

清新簡單又美味！正

冇嘜野搞，5點幾就收工LU
去左APM行下，順便去吉之島睇下有冇豬肋骨賣先，又係冇......TOO BAD
既然冇得賣就搭車返屋企LU

返到屋企見肚餓又未食得飯咪食個蘋果先

食飽飯睇下電視又一晚LU
唔知做嘜睇瞓覺果陣，喉嚨有的痕痕地呀！
唔好病呀！我唔想病呀！

愛與不愛

愛定唔愛，是一句說話或一動作可證明嗎？

早前係FACEBOOK睇到一段說話，我覺得當中的意思好正確

作為一個女性，當然好喜歡聽甜言蜜語，好喜歡被寵的感覺，但甜言蜜語的背後是有責任嗎？說了出口會做到嗎？

當一對情侶甜甜蜜蜜時，口中說的都是好的、甜的、愛的
相反
當兩者在有爭執時又會說出怎樣的說話呢？口中滿是埋怨的、髒的、壞的

我一向都是一個口直心快的人，很多時因為口比腦袋還要快而說出一些令人不開心的說話，當年紀一天一天長大，會慢慢學會停一停想一想；
雖然我的說話有時會不修飾，聽的人感都不快，但通常他們都不會為我的說話而怪我，為何呢？因為他們都知道我不是故意的！我都好高興各同事、朋友、家人、男朋友的體諒。

在我心中的愛是建基於尊重、體諒、包容、溝通、了解，說真的相當容易，但要實踐時難度真的很高呀！現在每天都在學習。

自問我是一個好奇心極強的人，說話用詞也很直接；

有一天跟男朋友說有關圖中的句子，他沒有回應我，只是笑了一聲
當然我會問他有什麼的睇法，他說他不會跟我吵架，因為一隻手掌拍不響的，當真的吵架時他會保持不回應，待我冷靜時才會跟我討論。

我都相信您會以這方法對待我這位心正口快的女朋友吧！

朱古力杏仁曲奇

朱古力人人都愛
唔開心食一粒，感覺心情會好一點
心情悶悶的食一粒，感覺好像冇咁悶

朱古力真係好容易配搭

今日配杏仁變成朱古力杏仁曲奇

材料：(72塊)
牛油 280g
糖粉 160g
蛋 70g
朱古力粉 21g
低筋粉 420g
杏仁粉 70g

做法：
1. 牛油加糖打至鬆發
2. 加入蛋打至均勻
3. 加入粉類切伴勻，搓成喜愛形狀，放入冰箱45分鐘切片
4. 以180度焗15分鐘

2012年7月3日星期二

酷熱的一天

在晴朗的一天出發
在酷熱警告的一天出發

今日天氣真係好好呀！但真係好熱呀！
行出街已經流汗呀！

炎夏幾時過呀？
好真係好唔鍾意夏天呀！

今日好早就返到公司喇！其實我都係9點到返到公司，對我來說已經叫早架喇！HAHA
老細同大老闆今日係香港，我當然早D返工啦，但佢兩個都返過公司，車！

LUNCH時間又未肚餓，所以到下午茶時間先去食野，我食左個吉列豬扒拼薯條！好味！

食飽飽行去銀行辦D私務，順便買D物資就返公司LU

準時返工當然要準時收工啦！
返屋企前去左超級市場睇下有冇豬肋骨賣，點知行左兩間都冇......OH

算了，返屋企吧！

食飽飯，約埋家姐E同兩隻小狗去公園玩
玩左半個鐘已經好熱喇！
返到屋企洗完腳到我自己沖涼
沖完涼舒服哂！
睇一陣電視都係時候SLEEP LU

2012年7月2日星期一

太空館

今日真係好好天呀！

滿載你心坎 Woo 那是藍天與白雲
滿載了歡欣 Woo 我想心裡真有真有
無窮快樂可發生

天氣咁好晨咁早就起左身，喺屋企執下自己野，跟住同波子影下相

跟住我都係時候裝身去街街LU

今日目的地係太空館呀！

去太空館做嘜呢？睇《追擊龍捲風》

其實套戲好鬼悶呀！
不過係買飛發生左一件事，令我有一個開心的一天

話說係我買飛果陣，就有以下對話：
T: 買邊場邊套戲呀？
C: 宜家仲有邊場有位呀？
T: 5點有一場，不過得番第一行
C: 下，第一行會唔會好辛苦呀？
T: 會架
C: 咁唔好喇！我驚睇完要去睇醫生呀！咁仲有邊場呀？
T: 7點20分啦！
C: 咁呀是但啦！
T: 係咪兩張學生飛呀？
C: (心中暗笑)唔係呀，兩張大人呀！
T: 今日有學生飛喎！
C: 我唔係學生呀！唔該兩張大人啦！

其實唔係學生已經好多年了，今時今日仲有人話我似學生，我都真係好開心，唔理佢氹我又好定真係覺得我似學生也好，我都開心了一整天！HAHA

睇完套悶戲後，就去醫肚LU
我地去左食拉麵《橫綱拉麵》
間野成日都咁多人，我地足足等左差不多一個鐘呀！
食飽飽都已經十點幾喇！

餐廳資料：
橫綱Yokozuna
地址：油麻地彌敦道466-472號恩佳大廈地下
電話：2783 0784

2012年7月1日星期日

回歸15年喇@有食神

香港已經回歸祖國15年喇！
話咁快就15年，15年間有D咩變化呢？

回想15年，我覺得香港係退步多過進步囉！
15年間市民的負能量不斷增加，經濟唔好！

其實一向都好懷念英國政府管治香港果陣，當時的我還是一名學生，對政治沒有任何認識，雖然宜家都冇HAHA，但眼見宜家的政府及一班議員，只可說四個字〈不知所謂〉！日日都喺度嘈嘈閉，係又閙唔係又鬧，根本係冇POINT架！

今日間直係食神架到呀！
LUNCH同家姐E一家同埋細佬去左《龍皇》飲茶呀！五個人食左好多野呀！

我地先叫左個套餐，入面有一個冬瓜蟹燉湯、欖菜菇菇餃
咕嚕肉、蒸魚
海節拼鵝翼同埋欖菜蛋白炒飯

仲額外叫左D點心添
《糖心皮蛋》

好好味春卷同埋燒賣

椒鹽魷魚、叉燒包同鳳爪

一頓豐富而美味的午餐呀！

食飽飽返屋企執下野，換下床單已經係6點喇！又係時候諗下今晚食嘜好了！
家姐E提議去西貢食海鮮呀！次次諗唔到食嘜都係去食海鮮......HAHA

我地入到去大約7點，其實仲係好早，但點解已經咁多人架！
我地等左一陣先有位呀！

坐底後即刻有D前菜食下先
《暖苙苙叉燒》同《沙薑雞腳》