COOKIE DAY

星期六咩事晨咁早起身呀！
咪就係因為早兩日收到哨哨話要食曲奇呀！

尋晚整定左個麵糰，今朝起身就焗啦！
九點半開始焗，終於焗到12點幾先焗完，我都冇數過焗左幾多塊，保守估計應該有200幾塊

 

 四隻味總有一隻你鍾意的

焗完曲奇成身汗呀！沖番個涼就要出街拍拖拖喇！

Shopping Day

Happy Friday La

工作都係冇特別要講呀！
都係清清閒閒，無驚無險又收工LU

LUNCH落街果陣，行過間夜令店見到個袋仔好得意呀！
我仲好叻咁由$498講到$200，哈哈！

 收工後去左阿宜到買衫呀！
同埋要拎番上次訂果對涼鞋呀！
好靚架！

敗完家，就返屋企喇！
今晚屋企冇煮飯呀！

返屋企前去SUPERMARKET買野先，因為我今晚要整定個曲奇麵糰呀！
返到屋企洗完手就開工LU

一整就整左四種味的麵糰，分別有朱古力杏仁、綠茶杏仁、朱古力綠茶格格同埋伯爵茶夏威夷果，整好哂真係有D倦呀！快D沖涼瞓覺喇！

沖完涼，同我親愛的傾左一陣電話就瞓LU

提早

今朝到9點先起身呀！
唔好以為我唔洗返工喎！
只係我返工比較自由，冇人會理我幾點返工
所以我就可以瞓到咁晏先起身喇！

返到公司都10點幾喇！
做下野，上下網都已經2點喇！

同個同事落樓下食下午茶先
但唔知點解突然好頭痛呀！
我諗住叫左個雞脾薯條食左會好D啦！
點知食完想嘔添呀！

返到公司即沖入廁所嘔番個下午茶出黎，嘔完真係舒服哂！

準時收工返屋企，因為今晚屋企做節呀！
今晚好好餸，不過掛住食冇影相喎！HAHA

今晚有媽咪自己整的卥水鴨同白切嘉美雞、蒸魚、腰果炒西芹、炒白菜....仲有老黃瓜赤小豆煲豬尾湯。好飽呀！

食飽飯仲有好甜美的西瓜作飯後果添。

抗氧化

今日好清閒呀！
上網上到唔知上咩好呀！
我知咁講會有好多人會羡慕，不過真係唔好羡慕呀！

既然咁無聊諗下LUNCH食嘜好啦！
諗呀！諗呀！諗呀！
都唔知食嘜好

今日食蒸飯啦！不過唔係自己整，落樓下買啦！

LUNCH後出左鰂魚涌幫老闆落訂金，順便拎埋支指甲油比SUZAN
跟住就搭車返公司LU

5點9收工喇！
今晚去街街呀！

今晚食嘜好呀！
突然好想食《星座冰室》呀！

《蕃茄牛肉撈蛋通》同埋《蕃茄牛肉炒蛋通》

食飽飽，行一陣就去食糖水
去邊到食好呢？
去九龍城啦！
去九龍城《金滿堂》啦！

唔記得影相添！
食完又行一陣就歸家去了

叉燒

在3號風球的一天出發
3號波幼稚園唔洗返學呀！
如果3號波唔洗返工就好喇！(發夢中)

返到公司又沖麥皮食呀！係時候減下肥喇！
感覺近排好似肥左少少呀！

不過我真係好唔LIKE食麥皮呀！
但為了靚，唔鍾意食都要食

早餐食左麥皮，LUNCH食嘜好呢？
尋晚食剩左D叉燒，一於煮叉燒湯米啦！買多兩條菜先

《菜遠叉燒湯米》

 簡簡單的一個午餐已經好滿足LU

準時收工返屋企食飯LU

Carrie's Birthday Dinner

又到一個星期好倦的一天呀！
經過星期六日兩天的活動，星期一真係有點倦呀！

今朝返到公司沖左杯麥皮食下先，我要減下肥呀！
做一陣野已經係12點幾喇！
煮個LUNCH食下先

《火雞腸芝士蕃茄醬長通粉》

一個簡簡單的長通粉，已令我充滿力量呀！

食過LUNCH又要小休一陣呀！
小休左大半個鐘又要努力工作喇！其實我都冇嘜野做！HAHA

放工後約左CARRIE食BIRTHDAY DINNER呀！
CARRIE話要食海鮮呀！
咁我地約左喺官塘等，再返屋企攞車就出發了
去到西貢都未夠7點，泊好車就慢慢行去《通記》

坐低左後，先食D前菜先
《沙薑雞腳》《熱辣辣叉燒》
雞腳同叉燒都係信心的保證，好好味呀！

再黎就係《刺身拼盤》

《豉椒聖子王》《薑葱炒膏蟹》

《美極煎大蝦》

因為係CARRIE生日，我特登ORDER了壽包

仲有飯後果西瓜添

 真係好飽呀！

順便喺LEE度預早祝CARRIE生日快樂，工作開心又順利，同埋最緊要係早日搵到她的白馬王子！





 
餐廳資料：
通記海鮮野味酒家
地址：西貢萬年街96-102號地下
電話：2792 7453

三重古古力曲奇

一向係古古力超級粉絲的我，一見到LEE個曲奇已經愛不釋手
曲奇在焗爐入面時，令滿室充斥著濃濃的古力香氣

一出爐稍涼已急不及待要試試，超香濃呀！
吃著濃濃的古力曲奇，真的有一份無明的幸福感覺呀！

材料：
牛油 100g
黑糖 70g
朱古力(70%) 100g
蛋 1隻
雲尼拿香油 1茶匙
低筋粉 150g
朱古力粉 30g
梳打粉 1茶匙
鹽 1/2茶匙
入爐朱古力粒 80g

 做法：
1. 牛油與黑糖拌勻至忌廉狀
2. 朱古力坐溶，加入牛油拌勻
3. 拌入蛋液及雲呢拿油
4. 拌入粉類及鹽拌勻
5. 拌入入爐朱古力粒
6. 以180度焗12-15分鐘，待涼即可